Солтүстік Қазақстан облысында құрама жем зауыты салынады
Қытайлық «Xian AiJu Cereals Oil Industry Group Co., Ltd.» (AiJu) Солтүстік Қазақстан облысында қуаттылығы 300 мың тонна құрама жем шығаратын зауыт салады. Тиісті меморандумға «KAZAKH INVEST» ҰК» АҚ мен «AiJu» компаниясы арасында Шэньси провинциясының бизнес-делегациясының Солтүстік Қазақстан облысына сапары барысында қол қойылды. Жобаның жоспарланған мерзімі 1 жыл, 50 тұрақты жұмыс орны құрылады. Инвестиция көлемі 16 миллион долларды құрайды.
Зауыт ІҚМ, ұсақ мал және құс үшін құрама жем жасау үшін ауыл шаруашылығы өнімдерін өңдеумен айналысатын болады. Зауыт жергілікті мал шаруашылығын дамытуға өз үлесін қосып қана қоймай, өңірдегі ауыл шаруашылығы тауарын өндірушілерге AiJu компаниясының алдында өз өнімдерін өткізуге сенімді серіктес таба алатын қосымша мүмкіндіктер жасайды деп күтілуде.
KAZAKH INVEST-тің аймақтық өкілі Данияр Шалабаев қытайлық компания жобасының маңыздылығын атап өтті, сондай-ақ ұлттық компания инвестициялық жобаны жүзеге асыруда қолдау көрсетуге дайын екеніне сендірді.
«AiJu Қазақстанда 2016 жылдан бері жұмыс істеп келеді, ел экономикасына 9,4 млрд теңгеден астам инвестиция құйған. Қытайлық инвесторлар қазірдің өзінде бір жобаны – Солтүстік Қазақстан облысының Тайынша ауданында өсімдік майын өндіретін зауыт құрылысын жүзеге асырды, енді олар Қазақстанда өз қызметін кеңейтуді жоспарлап отыр. Бұл жоба Қытай мен Қазақстан арасындағы ауыл шаруашылығы және ауылшаруашылық өнімдерін қайта өңдеу саласындағы ұзақ мерзімді серіктестіктің тағы бір дәлелі болып табылады», - деді Данияр Шалабаев.
Импортты алмастыру саясатын ескере отырып, зауыт өңір үшін де, жалпы ел үшін де стратегиялық маңызға ие болмақ. Кәсіпорын облыстың құрама жемге деген жоғары сұранысын қанағаттандырып, жақын шетелдерге экспорттауды көздеп отыр.
Қытайлық компанияның жобасы агроөнеркәсіп саласындағы халықаралық ынтымақтастық пен Қазақстандағы ауыл шаруашылығына инвестицияны қолдаудың маңыздылығын көрсетеді. Бұл саланы жаңғыртуға және оның тиімділігін арттыруға ықпал етеді, бұл өз кезегінде өңірдің тұрақты дамуына және тұрғындарының өмір сүру сапасын жақсартуға ықпал етеді.
